the story of me

2005-08-13T10:15:00.000-07:00

jæja þá er komið að því að skrifa eh. smávegist hér inn, var eiginlega búin að steingleyma þessu öllu saman:)
En já ég er flutt til reykjavíkur nánar til takið í kópavoginn en hér er æðislegt að vera. Ég fékk vinnu í áfengis og tóbaksverslun ríkisins og líkar bara rosalega vel þar svo núna í byrjun ágúst fékk ég mér aukavinnu á sólbaðsstofu svo að núna er ég alltaf brún og sælleg:)
Ofan á þetta allt saman þá byrjaði ég líka í ræktinni, við erum tvær sem að erum að púla saman í 2 tíma alla virka daga og Magga massi er einkaþjálfarinn okkar. Hún lætur okkur sko alveg púla. Samt er það þannig að Kolla er stundum með eh. stæla segir að þetta sé alveg skítlétt lóð og nú verði sko tekið á þessi öllu saman, en þegar kemur að því að taka meiri þyngdir þá stendur hún ekki alveg við stóru orðin og Magga léttir á hjá henni en ég fæ 5 kg þyngri lóð:) þetta er samt bara gaman að þessu öllu saman og engin leiðindi.
En tölvan að verða batteríislaus þannig að ég læt þetta duga í dag en l0fa ykkur sem lesið síðuna mína að ég mun skrifa inn meira eftir nokkra daga þegar betur stendur á.
Ég og Signý (meðleigjandi) og nokkrir vinir hennar ætlum að kíkja eh. út í kvöld og skoða skemmtanalífið í borginni:) vonandi gerist eh. skrautlegt þar:)

En bless í bili og munið að ég er æðisleg:)

stress og þreyta

2005-05-07T18:00:00.000-07:00

vá það er alveg að koma að þessu og ég á eftir að gera nánast allt. Ég er ekki byrjuð að pakka niður að neinu ráði og er enn í samningaviðræðum um bílinn sem mig langar til að kaupa en ég lít engu að síður á björtu hliðarnar því að ég hef alveg heila 48 tíma til að gera þetta allt saman:)
Í gærkvöldi (föstudagskvöld) héldum við Signý kveðjupartýið okkar, sem tókst bara ljómandi vel. Gerð var eðal bolla (ca. 15 lítrar) sem kláraðist og eins var fólk vel byrgt af vökva sem það kom með sjálft. Um 1 leytið var svo haldið niður í bæ á Kaffi Akureyri þar sem dansað var fram að lokun.
En ég ætla að hafa þetta stutt og laggott núna og skrifa bara alveg helling þegar ég er loksins flutt. Þá verður maður vonandi ekki alltaf svona þreyttur og stressaður.
Bið að heilsa.

komin frá rvk.

2005-04-25T20:05:00.000-07:00

jæja var að koma til Akureyrar frá Reykjavík núna í kvöld. Fórum smá útúrkrók og heim í sveit, en pabbi átti afmæli í gær og ég varð að kíkja aðeins á karlinn og óska honum til hamingju með daginn.
Ferðin suður gekk bara rosalega vel, við fengum íbúð í Kópavogi sem er hreint út sagt æðisleg, ég fékk vinnu (vibbý ehemm) og skemmti mér bara mjög vel að öðru leyti í höfuðborginni:). Núna í morgun.......... já eða gærmorgun þá var svo hringt í mig úr þessari nýju vinnu og ég á að mæta núna 12 maí og það meira að segja fyrir hádegi. Þannig að ég þarf að pakka öllu fyrir mánaðarmótin apríl/maí af því að ég ætla að fara heim í sveit, finna mér eh. samastað þar til að ég fæ íbúðina í rvk. og ég þarf að kaupa mér bíl:) Ætlaði að skoða bíl í rvk. í gær en fékk engan með mér sem að vissi meira um bíla en ég ( og ég veit ekki shit) þannig að mín ákvað að spýta bara í lófana og láta slag standa. En svo þegar ég ætlaði að prufukeyra bílinn sem að ég hafði séð og langaði í þá var eh. fólk bara búið að kaupa hann:/ þannig að ég ætla að halda áfram að skoða bíla þar til ég finn eh. annan sem mig langar í.
En það er kominn tími á að ég fari að koma mér í bólið, vinna í fyrramálið og svo er ég þreytt eftir ferðina.
Bið að heilsa mér þar sem að ég virðist vera sú eina sem að les bloggið mitt:) og mér þykir voða vænt um mig (knús)

manudagur

2005-04-18T16:37:00.000-07:00

vibbý það styttist óðfluga í flutninga:) og Iron Maiden líka, ég hlakka til.
En mín drattaðist í vinnuna í dag og vann mína 9 tíma (úff) ég er með svo mikinn vinnuleiða. Þegar vorið er að koma, sól, hiti og ferskur ilmur í loftinu þá langar mig bara að dútla mér einhversstaðar fjarri vinnu og hefðbundnu lífi. Mig langar meira að segja að fara að veiða:) það er að segja fisk. Enda með forfallna veiðiáráttu, ef einhversstaðar er vatn sem hugsanlega gæti verið fiskur í þá bara verð ég að kasta út öngli. Eftir það get ég dútlað mér við það í marga, marga tíma án þess þó að veiða neitt.
Ég er að hugsa um að fara bara niður á bryggju annað kvöld og sjá hvort að ég veiði ekki eh. handa mávunum. Síðast þegar ég fór í bryggjuveiði (sem var bara núna um páskna) þá veiddi ég krossfisk:) og var það öll veiði dagsins.
En jæja ég var að redda mér fríi í vinnunni í dag, við Signý erum að fara suður á miðvikudaginn að skoða íbúðir og fara í atvinnuviðtöl. Krossleggja fingur og vona að allt verði jákvætt þar:) ég er svo að hugsa um að fara til baka á laugardaginn (puttinn) og kíkja aðeins heim í sveit. Það eru komin fullt af lömbum, ég er meira að segja búin að fá tvö;). Mér finnast lömb vera algerar dúllur, það er svo gaman að halda á þeim og láta snoppuna á þeim í hálsakotið. Ég er svolítil sveitakerling í mér, kannski maður ætti bara að fara á Hvanneyri og finna sér einn bónda, og gerast húsmóðir á sveitabæ.
En jæja það er ekker vit í að vera að vaka frameftir, ætla að skella mér í sturtu og svo beint í rúmið. Og talandi um það, fyrir ekki svo löngu síðan þá uppgötvaði ég það að ég get legið bæði langsum og þversum í rúminu án þess að haus eða tær standi út fyrir. Er samt alveg heilum 13cm yfir dvergamörkum:)
En jæja bið að heilsa ykkur sem að nenna að lesa þetta og þið megið alveg commenta á eh. sem ég bulla hér. Þá veit ég allavega að einhver les þetta:)
Góða nótt!

sunnudagur

2005-04-17T08:59:00.000-07:00

Jæja þá er víst kominn sunnudagur:) vinnuvikan framundan sem og tannlæknirinn úff. Mér er svo illa við tannlækna að ég held að það teljist til að vera fóbía. En allavega þá á að taka úr mér endajaxlana, 2 stykki núna og svo hina 2 í næstu viku, ég bað um að fá eh. dóp á meðan á þessu stæði og það var víst ekkert mál. Skammturinn kostar bara 3000 kr. og ég á víst að verða alveg dingdong af því:) gaman að sjá hvernig það verður.
En helgin var mikið gaman og mikið fjör:) hér (akureyri) var mikið af fólki og þar með pottþétt uppskrift að snilldar djammi.
Get ekki sagt annað en að ég skemmti mér alveg konunglega. En af einhverjum ástæðum þá man ég bara ekki lengur orð af því sem að ég ætlaði að skrifa þannig að ég læt þetta duga í bili:)
Ekki það að neinn lesi þetta hvort eð er.

kveðja Þóra:)

2005-04-14T17:37:00.000-07:00

Vakna upp með andfælum. Mér finnst eins og ég sé að kafna, munnurinn og hálsinn er þurr, kyngi nokkrum sinnum. Litast um í herberginu, það líður nokkur stund áður en augun venjast myrkrinu, það er enginn hér nema ég.Loka augunum aftur og reyni að sofna. Mér líður best þegar ég sef þá er ég hjá þér, jafnvel þó svo að ég sjái ekki andlitið þitt og þú heitir öðrum nöfnum, þá veit ég í hjartanu að þetta ert þú.Ég bylti mér og kuðla koddann minn fram og til baka en svefninn vill ekki koma til mín. Það endar með að ég ligg og horfi upp í loftið, renni fingrum vinstri handar í gegnum hárið mitt, það er mjúkt og það lyktar vel.Mér líður oft svo vel þegar ég strýk í gegnum hárið, það róar mig og mér finnst ég ekki vera ein lengur.Af hverju varð það mitt hlutskipti að vera einmana, vera frábrugðin og finna mig ekki í þessum staðlaða heimi. Svo oft hefur mig langað til að yfirgefa hann og svo oft hef ég sannfært sjálfan mig að hamingjan sé ekki svo fjarlæg að ég geti ekki fest hönd á henni.Ég finn einhverjar tilfinningar hrannast upp innra með mér, ég er löngu hætt að geta tjáð þær. Þekki þær ekki lengur sem annað en einhver óþægindi sem dofna ef að ég byrgi þau sem lengst inni. Sumir gráta, ég get ekki grátið lengur, ég er búin að gleyma hvernig á að gera það.Getur sú manneskja elskað sem getur ekki grátið, fyrsta verk okkar þegar við komum í heiminn er að gráta. Hitt lærum við með tímanum.Mennirnir eru svo margir og heimurinn er svo stór, ég mun aldrei sjá hann allan. Mig langar samt að sjá heiminn, af hverju veit ég ekki.Kannski er ég að leita að einhverjum sem er eins og ég, kannski vil ég bara flýja á nýjan og nýjan stað eða kannski er þetta bara forvitni. Ég hef oft velt þessari hugsun fyrir mér en aldrei komist að neinni niðurstöðu.Vekjarinn á símanum sker í gegnum þögnina, minnir mig á að friðsæld næturinnar sé liðin og enn einn dagurinn hafinn. Enn einn dagurinn sem ég þarf að fara á fætur og setja upp grímuna mína.Enn einn dagurinn sem ég lifi án þess að sjá þig.

Skrifað heima þann 16. febrúar 2005.

smá pæling

2005-04-14T17:30:00.000-07:00

Skammdegishugsanir

Bílarnir keyra hjá einn af öðrum, er löngu hætt að taka eftir þeim nema ef að svo vill til að óvenjumikil vélahljóð séu frá þeim.Sit bara hér og virði fyrir mér mannlífið, finnst það þó frekar fábrotið, sama fólkið hér kvöld eftir kvöld og umræðurnar virðast yfirleitt vera þær sömu. Ætli þetta fólk taki eftir þessu eða skyldi því finnast þessar innihaldslausu umræður hafa eitthvað gildi. Velti þessu fyrir mér í smá stund en án niðurstöðu, kannski er þetta bara í hausnum á mér, eingöngu mín skoðun á þessu öllu saman.Það er orðið töluvert dimmt úti enda komið fram á kvöld og nóvember genginn í garð fyrir nokkru síðan, skrítið hvað maður verður oft einmana og dapur þegar sólin er hætt að skína og dagarnir umbreytast í kvöld og nótt. Einmanaleikin getur stundum dregið úr manni allan mátt og maður verður áhugalaus gagnvart umhverfinu og því sem það hefur uppá að bjóða. Finndu þér áhugamál segir fólk við mann, reyndu að finna þér eitthvað að gera, patent lausnir frá þeim sem þekkja þetta ekki. Samt virðist þetta fólk hafa lausnir á vandanum sem fólk eins og ég glími við. Veit þó að vandinn leggst í dvala með hækkandi sól og á einhvern hátt virðist maður komast í gegnum þessa löngu vetrarmánuði án þess að verða fyrir varanlegum skaða,hvort sem er á líkama eða sál.Finnst að ég hafi náð botninum þetta árið svo að nú er bara að bíða, geri engar væntingar til morgundagsins eða dagsins þar á eftir. Allir þessir löngu dagar renna hvort eð er saman í eitt og maður má hafa sig alla við til að muna eftir einhverjum sérstökum tilvikum.Barþjónninn kemur að borðinu til mín og kippir mér uppúr þessum hugsunum, spyr hvort að hún geti fært mér eitthvað, já sviss mokka segi ég hugsunarlaust. Fæ bollann á borðið nokkrum augnablikum síðar.Tek nú eftir að það hefur fjölgað inná kaffihúsinu, kannast við flest andlitin en sé þó nokkur ný, veg og met þessi nýju andlit í augnablik. Tveir miðaldra menn standa við barinn og spjalla, sýnist að samræðurnar séu á þessum yfirborðskenndu nótum. Allavega sýna svipbrigði þeirra ekki annað. Svipur fólks og líkamsbeiting sýna oft meira en það vill láta uppi. Sumir búa jafnvel til aðra persónu þegar farið er út og heimilið þrengir ekki lengur að því og oft virðist þessi önnur persóna fólks hafa þann eina tilgang að þjóna þessum sambandsmarkaði, gera það sem áhugaverðast í augum annara sem eru í sömu sporum og það sjálft. Ætli að það sé þessvegna sem svona fá sambönd ganga upp hjá fólki. Þegar ég fletti í gegnum hugann þá man ég ekki eftir neinum sem hefur fundið förunaut fyrr en eftir nokkrar misheppnaðar tilraunir. Ætli augu fólks opnist með tímanum og það geri sér grein fyrir að þetta gervisjálf tærist og einn daginn stendur maður allsnakinn frammi fyrir persónu sem maður veit varla meira um en nafn og heimilisfang.Hár talandi heyrist, sé að hann kemur frá eldri konu sem er talsvert í glasi, með henni er maður á að giska um fertugt og hún kynnir öðrum gestum staðarins að hann sé sonur hennar, fæddur á því góða ári ´´69. Eftir þessa háværu kynningu virðist sem hún hafi ekkert meira að segja, stillir sér upp við barinn og kveikir sér í sígarettu. Ætli að hún sé ein af þeim sem hafa ekki kjark til að sýna þá persónu sem hún er, finnist hún jafnvel lítils metin og hafi ekkert að gefa. Sé í þeim flokki fólks sem er of óframfærið til að standa frammi og segja hér er ég, virðið mig fyrir það sem ég er.Maður veit aldrei hvað fólki finnst innst inni um mann sjálfan, er hægt að virða einstakling skilyrðislaust og treysta honum til fullnustu. Hvað er það sem fær mann til að byrja á að vilja kynnast einhverjum, er það lykt, útlit, hegðun eða sitt lítið af hverju.Þessar ruglingslegu hugsanir renna í gegnum hugann án þess þó að skilja neitt eftir sig nema spurningamerki. Veit sjálf að ég dæmi fólk án þess að þekkja það, vantreysti fólki sem ég þó segist treysta og er of upptekin af eigin framapoti til að virða aðra sem mér finnst standa í vegi fyrir mér.Ljósin kvikna, það á að fara að loka. Stend upp og teygi úr mér, geng að barnum til að borga. Þú ert falleg persóna heyri ég sagt að baki mér, lít við og sé dökkhærðann mann sitja fyrir aftan mig, elskaðu þig eins og þú ert, það myndi ég gera segir hann. Ósjálfrátt bros kemur fram á varir mér og þessi óvæntu orð frá ókunnugum manni fá mér til að líða betur. Skrítið, hugsa ég þegar ég geng út, hvað fá orð frá einhverjum sem maður veit engin deili á geta lýst upp tilveruna.

Skrifað á Kaffi Akureyri þann 7 nóvember 2004.

byrjunin

2005-04-14T17:14:00.000-07:00

jæja sæl öllsömul:)

ákvað að setja upp blogg hér í staðinn fyrir fólk.is þar sem að sú síða er allt of hægvirk fyrir minn smekk og þolinmæði.
En jæja í dag er fimmtudagur og því bara einn dagur eftir í vinnunni, eftir það kemur hin langþráða helgi. Ég er með vinnuleiða á háu stigi þessa dagana, mig langar bara að gera eh. fjárann af mér. Fara eh. og eyða peningum og skemmta mér en því miður er það ekki valmöguleiki þar sem að maður þarf víst að eiga peninga til að geta eytt þeim.
En það er eitt ljós í tilverunni, ég er loksins að flytja til borgar óttans (Reykjavík) ég get varla beðið. Enda búin að geyma það allt of lengi að koma mér af stað þangað. Komin með æluna upp í háls af Akureyri og lífinu hér, allt of margir akureyringar eru með spýtu rekna marga metra upp í rassgatið og þar af leiðandi leiðinlegir eftir því.
Held samt að hugurinn eigi eftir að leita til útlanda eftir að ég fer til Reykjavíkur, kannski er Ísland bara of lítið fyrir mig:)
Heimurinn er svo rosalega stór og hefur upp á svo margt að bjóða, en ég held að allt of margir leiði aldrei hugann að því eða hafi hvorki kjark né þor til að gerast rannsakendur.